What’s On

Upcoming events at the Xanana Gusmão Reading Room

Série Semináriu kona-ba Prevensaun Covid-19 husi OMS – Marsu 2020

Hodi responde ba sujestaun husi ami-nia kliente sira, ami kolabora ho Organizasaun Mundial Saúde (OMS) atu hala’o workshop semanal kona-ba prevensaun Vocid-19 ba públiku sira iha Sala Leitura Xanana Gusmão. Iha sesaun rua mak konsege hala’o iha ami-nia espasu ‘Uma Mahon’ ho partisipasaun barak tebes hiso públiku sira. Sesaun dahuluk hala’o iha loron 18 Marsu ho total partisipante na’in 94 ( mane 30, feto 64) no sesau daruak  hala’o iha loron 20 Marsu ho total partisipante 56 (mane 21, feto 35), partisipante adisional mak ami-nia funsionáriu no voluntáriu sira.

Hafoin sesaun dahuluk nian, ami-nia funsionáriu no voluntáriu sira instala fasilidade ijiene iha ami-nia edifisiu atu nune’e ema hotu bele fasil atu asesu no ami sei enkoraja sira atu fase liman beibeik no molok no hafoin uza ami-nia fasilidade sira. Iha loron 19 Marsu, ami taka ami-nia edifisiu ba asesu públiku hodi fo tempu ba ami hamoos ekipamentu sira iha biblioteka no muzeu laran. Ami mós dezenvolve tiha ona regra foun sira atu gia ami-nia funsionáriu, voluntáriu no vizitante sira, iha momentu hanesan ami tau ona planu kontijensia ba ami-nia servisu fatin. 

Projetu Livru ba Biblioteka sira

Biblioteka barak iha munisípiu sira falta ba livru tanba presu livru no kustu imprime ho folin karun tebes iha Timor-Leste. SLXG sempre buka apoiu husi rai liur atu hetan livru barak liu tan, bainbain husi ami-nia parseiru sira sira iha Australia. Daudauk ne’e, ami simu doasaun livru ho númeru boot hisi Fundação Déjà Lu no Marta Cancela de Amorim iha Portugal. Kolaboraasaun ida ne’e bele akontese tanba hetan tulun husi Marta Contente, profesora Portugés ida ne’ebé mak dedika servisu voluntária hodi hanorin Portugés iha ami-nia espasu. Ami halo tiha ona selesaun ba livru sira no balun sei tau hamutuk iha ami-nia koleksaun maibé livru barak ma kami sei distribui ba iha biblioteka sira seluk. Durante fulan Fevereiru, ami distribui ona livru sira ba biblioteka sira iha munisípiu mak hanesan Biblioteka Eskola Maubisse iha Ainaro, Biblioteka Don Bosco Maumali iha Maliana, no Fundação das Irmãs de Nossa Senhora de Fátima, Memo iha Maliana. Wainhira liu tiha periodu Covid-19, ami sei kontinua fali halo ba iha biblioteka sira mak iha ona ami-nia lista.

Loron Internasionál ba Lian Materna – 21 Fevereiru 2020

Hodi komemora loron internasionál ba Lian Materna, ami hala’o kompetisaun hakerek istória populár iha lian Mambae. Mambae hanesan lian ida ne’ebé ema ho númeru boot liu koalia iha Timor-Leste. Istória hirak ne’ebé mak halibur iha kompetisaun ida ne’e sei inklui iha projetu produsaun livru ho série 5 iha lian Mambae, hetan fundu husi Governu Estadu Victoria – Australia, Departamentu Envairomentu, Rai, Bee, no Planeamentu (sigla Inglés DELWP).

Espozisaun Arte kona-ba Inkluzaun Sosial

20 Fevereiru 2020
Hodi selebra Loron Mundial ba Justisa Sosiál, ami hala’o espozisaun arte kona-ba inluzaun sosiál hahú husi 23 – 27 Fevereiru 2020. Eventu ida ne’e organiza husi CODIVA no Joven Hatutan ho objetivu atu hasa’e konsiensia públiku kona-ba direitu igual ba ema hotu-hotu la haree ba sira-nia estatutu sosiu-ekonómika, etnia, relijiaun, kondisaun sa’ude, defisiénsia, idenrtidade jéneru ou orientasaun seksual. CODIVA no Joven Hatutan halo advokasia maka’as ba asuntu inkluzaun sosiál no direitu komunidade LGBT iha Timor-Leste.

Workshop Gratuita kona-ba Hakerek husi Library For All (LFA) – Australia

Iha loron 13 Fevereiru 2020, Dra. Lara Cain Gray husi Library For All (LFA) – Australia hala’o Workshop Gratuita kona-ba Hakerek iha Sala Leitura Xanana Gusmão nu’udar parte husi sira-nia projetu foun atu lansa biblioteka dijitál ho livru ba labarik sira iha Timor-Leste. Partisipante sira iha workshop ne’e maka estudante mai husi universidade sira iha Dili laran inklui SLXG ninia funsionáriu no voluntáriu sira, ho total ema na’in 25 (mane 11, feto 14). LFA ninia objetivu maka atu hetan istíria orijinal hamutuk 25 ne’ebé mak hakerek rasik husi Timor-oan sira. LFA iha hela prosesu selesaun ba istória furak sira husi partisipante hirak ne’e no sei halo prodúsaun iha tempu besik. Dra. Lara Cain Gray nu’udar Espesialista Biblioteka (Estratéjia Konteudu & Publikasaun) iha Library For All.

Komemora Loron Internasionál ba Feto & Labarik Feto sira iha area Siénsia

11 Fevereiru 2020

Ami-nia temátiku ba eventu ne’e maka “Hakbiit Feto & Labarik Feto sira ho Siensia & Teknolojia”. Ami selebra loron espesiál ida ne’e liu husi hala’o atividade esperiemntu sientífiku no atividade sira seluk ne’ebé mak lidera rasik husi maluk feto sira husi departamentu Kímiku iha Unversidade Nasionál Timor Lorosa’e (UNTL). Eventu ida ne’e hetan partisipasaun husi ami-nia kliente sira, estudante universitáriu no estudante sira husi ensinu sekundáriu públiku mak hanesan ESP 05 de Maio, ESP 12 de Novembro, no Escola Catolica Mater Misericordia – Gleno, Ermera. Total partisipante hamutuk ema 45 (mane 15, feto 40).

Semináriu kona-ba Prevensaun Virus Corona

Iha loron 7 Fevereiru 2020, ami hala’o seminariu ida ho orador maka Sr. Antonio da Costa, Diretór Nasionál ba Kontrola Doensa husi Hospital Nasionál Guido Valadares atu informa ba públiku kona-ba saida maka virus Corona no oinsá ita bele hasoru situasaun ne’e. Semináriu ne’e organiza husi ami-nia grupu joven ho naran “Youth Community Care” no hetan partisipasaun boot tebes ho total ema 100 (mane 37, feto 66). Partispante sira hato’o pedidu ba ami atu hala’o barak tan sesaun sira kona-ba asuntu ne’e iha SLXG. 

Semináriu kona-ba Kankru Susun

Iha loron 4 Fevereiru 2020, ami selebra loron mundiál ba Kankru iha SLXG liu husi hala’o workshop ida atu eduka ami-nia joven sira, liu-liu ba ami-nia kliente sira atu hetan koñesimentu kona-ba kankru susun no maneira di’ak atu halo tratamentu. Total partisipante kuaze besik ema na’in 100 (mane 38, feto 56), mai husi estudante universitáriu no eskola sekundáriu sira iha Dili laran no komunnidade enjerál. Workshop ne’e diriji husi doutor joven ida ho naran Bonifacio de Jesus, servisu iha Klínika Bairopitte.